Пра здарэнне шклоўскай раённай газеце "Ударны фронт" распавёў начальнік мясцовай інспекцыі па справах непаўнагадавох Раман Бакуновіч. Перад Новым годам непаўнагадовая навучэнка ліцэя прыехала да свайго каханага ў госці. Хлопца дома не было і яна засталася яго пачакаць, яшчэ не ведаючы, што малады чалавек вырашыў парваць адносіны і яна прыехала ўжо не жаданым госцем. Пра гэта ён паведаміў ёй смс-кай.
Паведамленне так паўплывала на дзяўчыну, што яна знайшла ў хаце бой-фрэнда снатворнае, якім і напілася. Моцнадзеючыя таблеткі маглі б зрабіць сваю страшную справу, калі б хлопец не вярнуўся да хаты. Ён яе знайшоў амаль без прытомнасці і выклікаў хуткую дапамогу, якая паспела дапамагчы дзяўчыне. Па стане на 11 студзеня дзяўчына знаходзіцца пад назіраннем медыкаў.
