Супрацоўнікі ГУБАЗіК спынілі нелегальны канал пастаўкі санкцыйных гародніны і садавіны ў Расею. У складзе злачыннай групы было больш за дзесяць чалавек — грамадзяне Беларусі і Расеі. Нелегальнымі пастаўкамі гародніны і садавіны з Турцыі і Еўропы група займалася са снежня 2016 года да красавіка 2018 года.
У нелегальнай групе былі жыхары Менска, Оршы і грамадзяне Расеі. У якасці адстойніка для фур выкарыстоўвалася пляцоўка казіно паблізу беларуска-расейскай мяжы (на фота). У рамках справы арыштавана маёмасць фігурантаў коштам каля мільёна даляраў(!). Санкцыйны груз прыбываў у Беларусь і афіцыйна размытоўваўся на рэквізіты падкантрольных фігурантам мясцовых ілжэпрадпрымальніцкіх структур, паведамілі ў ej.by са спасылкай на МУС Беларусі. Фармальна рэалізацыя плодаагародніннай прадукцыі ажыццяўлялася на тэрыторыі Беларусі, у рэальнасці жа — па падробленых дакументах вывозілася ў Расею.
Адстойнікам для фур з "санкцыёнкай" служыла пляцоўка каля казіно, размешчанага ў Дубровенскім раёне на беларуска-расейскай мяжы — яно таксама належала ўдзельнікам злачыннай групы.
СК Беларусі пачаў крымінальную справу (незаконная прадпрымальніцкая дзейнасць у складзе арганізаванай групы). Маёмасць фігурантаў арыштавана. Гэта нерухомасць, грошы, аўтамабілі і каштоўныя металы агульным коштам больш за 2 млн рублёў. Арыштаваныя таксама банкаўскія рахункі кампаній, падкантрольных фігурантам. Трое з іх затрыманыя.
"Санкцыёнка" — тавары, якія патрапляюць пад санкцыі, уведзеныя уладай Уладзіміра Пуціна на тэрыторыі Расеі. Гэта санкцыі ў адказ у дачыненні да Еўропы і Амерыкі, да краін, якія ўвялі санкцыі супраць расейскіх тавараў і грамадзян за развязванне Расеяй баявых дзеянняў ва Украіне, а таксама парушэнне міжнародных пагадненняў, у тым ліку і на тэрыторыі Сірыі. У Расеі санкцыйныя тавары ціснуць трактарамі і бульдозерамі, у тым ліку, напрыклад, рэдкі і дарагі сыр, які быў правезены на расейскую тэрыторыю, але быў там затрыманы да рэалізацыі. Неаднаразова фіксавалася, як расейскія грамадзяне прыходзілі на звалку пасля цісканіны тавараў і падбіралі, што яшчэ ацалела.
Расейскімі мытнымі органамі фіксаваліся выпадкі паставак крэветак і іншых далікатэсаў, якія трапляюць пад санкцыі, з маркіроўкай вытворчасцяў у Беларусі, хоць на самай справе дадзеныя прадукты ў Беларусі не вырабляюцца.
