Упершыню ў Оршы праходзіць выстава гульнявых калекцыйных лялек. Больш за 100 унікальных асобнікаў прадставіла жыхарка Шклова Ганна Страхава. Яе першая лялька — прыгажуня Эмілі ад амерыканскага майстра-лялечніка Дыяны Эфнер. У Эмілі, як і ва ўсіх астатніх яе «сваячак», ёсць пасведчанне аб нараджэнні — дакумент, які пацвярджае сапраўднасць, які распавядае пра аўтара, гісторыю стварэння і наяўнасці «двайнікоў». Ёсць у калекцыі і рэдкія асобнікі. Напрыклад, задуменная бялявая Міс, зробленая амерыканкай Памэлай Эрф. Такіх лялек у свеце усяго 1500 штук. Або сядзячая фарфоравая лялька з узрушаючай мімікай Гарэза Майкл мастачкі Глорыі Ліві.
Настаўніца гісторыі мае намер папаўняць калекцыю. Цяпер яна ў чаканні лялькі Сары ад аўтара-лялечніка Лінды Рык. У свеце іх толькі 50 штук, паведамляюць "Витебские вести". Па словах Ганны Страхавай, галоўнае — берагчы «падапечных» ад прамых сонечных прамянёў і пылу.
