Такую інфармацыю на днях распаўсюдзілі адразу шэраг расейскіх навіновых тэлеграм-каналаў, якія ўжо не аднойчы былі заўважаныя ў распаўсюдзе так званых "фэйкавых" навінаў. Такія навіны звычайна з'яўляюцца на адным з каналаў і потым рэпосцяцца іншымі. Паводле дадзенага фэйку, "Мінск прапанаваў правесці ў Беларусі вучэнні НАТА і размесціць у краіне амераканскіх спецыялістаў па даследванню сацыяльных сетак і кантролю за інтэрнэтам. Абмяркоўвалася пытанне і пра размяшчэнне авіябазы НАТА ў Балабасава ў 70 кіламетрах ад мяжы з Расіяй. Беларусь запрасіла за арэнду аэрадрома 1 мільярд даляраў на год".
Хлуслівая інфармацыя пра Беларусь з'яўляецца ў такіх расейскіх "СМІ" даволі рэгулярна і часта ў дні блізкія да перамоваў расейскага і беларускага кіраўніцтваў. Пры чым не рэдка яны падаюць навіны менавіта ў тым ключы, што Беларусь адыходзіць ад Расіі ў бок Захаду, НАТА, ЗША і г.д. Але ўпершыню фэйк быў звязаны з Аршаншчынай.
Канешне, у такую навіну паверыць складана, але даўно вядомая фраза "Чым большая хлусня, тым хутчэй у яе павераць". Менавіта таму расейскія фэйк-каналы, бывае, даходзяць да неверагодных навінаў пра сусветныя змовы, таемныя перамова пра вяртанне Пазняка ды збіццё рускамоўных у Беларусі.
