20-гадовы хлопец спрабаваў "касіць" ад прызыву ў войска. За гэта і за тое, што своечасова не сплаціў штраф ён атрымаў 1 месяц зняволенне. У дзень вызвалення - 11 сакавіка -маладзён апынуўся ў вёсцы Хільковічы суседняга Круглянскага раёна - паведамляе прэс-служба Следчага камітэту. У Хільковічах ён знаходзіўся разам з 16-гадовай дзяўчынай у закінутым доме.
Па якой прычыне паміж маладымі людзьмі ўзнікла сварка следства не паведамляе, а скончылася сварка тым, што маладзён у прыступе злосці задушыў дзяўчыну. Зразумеўшы, што ён нарабіў хлопец паспрабаваў збегчы з месца здарэння. Але для міліцыянтаў не склала цяжкасці знайсці яго - ад дома ішлі добра бачныя сляды ў бок лесу. Супрацоўнікі праваахоўных органаў арганізавалі пераслед падазраванага і злавілі яго ў 20 кіламетрах ад Хільковічаў.
