Уладзімір Ульянаў «Ленін» і праз амаль стагоддзе пасля смерці выклікае непрыняцце і нават нянавісць у шэрагу людзей. Каля чыгуначнай станцыі Лучоса месяц таму быў здзейснены першы напад на помнік «правадыру сусветнага пралетарыяту». Тады два анархісты зламалі помніку руку, абодва былі затрыманыя неўзабаве. Заведзена крымінальная справа па артыкуле «Хуліганства».
Але праз месяц гісторыя паўтарылася — помнік Леніну на гэты раз аблілі чырвонай фарбай. Ігар Цеплякоў, старшыня садаводчага таварыства, на тэрыторыі якога знаходзіцца помнік, напісаў у рэдакцыю vkurier.by: «Вандалы вновь поиздевались над нашим „Лениным с котом“, облили его красной краской. Смею предположить, что это звенья одной и той же цепи... Только пока умысел не понятен...» На гэтым рэсурсе змешчаны і відэазапіс з камеры назірання.
Пытанне знаходжання помнікаў Леніну практычна ва ўсіх беларускіх гарадах неаднаразова ўздымалася ў краіне. Патрыятычная частка грамадства лічыць, што першы кіраўнік СССР зрабіў шмат злачынстваў супраць беларускага народа, а таму помнікі ў яго гонар выглядаюць здзекам з мільёнаў ахвяр камуністычнага рэжыму. Праўда, многія нацыянальныя сілы пры гэтым кажуць, што найлепшы спосаб прыбраць помнікі і вуліцы ў гонар савецкіх дзеячоў, якія датычныя да рэпрэсій і іншых злачынстваў, не вандалізм, а згода дзяржавы на знос і перайменаванне. Аднак пакуль улады ўсяляк ігнаруюць падобныя просьбы.
У Оршы некалькі гадоў таму на помніку Леніну напярэдадні 7 лістапада з’яўляліся налепкі з дастаткова рэзкім выразам: «Памёр Ленін, памрэ і савок». У іншых беларускіх гарадах да помніка яму нярэдка прыносілі вянкі з калючага дроту і ўлёткі пра злачынствы камуністаў.
