У Оршы адсутнічае адэкватная пляцоўка для гульні ў пляжны валейбол. А гэта досыць папулярная забава ў аматараў актыўнага ладу жыцця, асабліва ў летнія дні, калі адна прыемнасць гуляць у валейбол на пяску, адначасова загараючы і робячы фізічныя практыкаванні. Аднак, як выглядае, шмат хто з маладых аршанцаў, якія выяўляюць ахвоту пагуляць у валейбол на пяску, не могуць здаволіць свае патрэбы на пляцоўцы прыдатнай якасці. Бо яе ў Оршы на дадзены момант няма. Той пясок, які прапануецца на Гарадскім стадыёне, на думку аматараў актыўнага адпачынку, не адпавядае нормам. Па-першае, яго мала, а па-другое ён ужо не той якасці, каб чалавек гуляў спакойна, не хвалюючыся за здароўе. Акрамя таго, сетка імкліва прыходзіць у «нетаварны» выгляд.

Праблема з пляцоўкай для пляжнага валейболу для Оршы не новая — месцаў, дзе можна разыграць мяч на прыродзе без рызыкі для здароўя ў горадзе дагэтуль няма. А пра пляцоўку на стадыёне яшчэ ў 2017 годзе пісаў наш сайт у матэрыяле «Валейбол на камянях». Тады некалькі чалавек пасля паходу на пляжны валейбол паскардзіліся на парэзаныя камянямі ногі — пясок ужо тады быў непрыдатны для гульні. Як бачым, нягледзячы на ранейшыя абяцанні выправіць сітуацыю, гады ідуць, а пра пляжны валейбол мы вымушаныя ўзгадваць толькі ў негатыўным святле.