У мінулым годзе ў Вільні пры ўваходзе ў раён "Ужупіс" (Зарэчча) на мосце праз Вілію была ўсталяваная скульптурная кампазіцыя аршанскай мастачкі Таццяны Тур "Эпілог". Кампазіцыя складалася з двух драўляных скульптураў. На адным беразе ракі стаяў мужчына, а на другім жанчына раз'яднаныя ракой, але аб'яднаныя мостам.
Скульптуры спадабаліся мясцовым жыхарам і турыстам - вакол іх пачалі з'яўляцца легенды. Нешта кшталту, калі жанчына патрэ скульптуру мужчыны, то ў яе наладзіцца асабістае жыццё і наадварот мужчына мусіць пацерці жанчыну. Але гэтым летам скульптура жанчыны з моста знікла. Па асноўнай версіі, нехта скраў жанчыну, хаця ў паліцыю ні мастачка, ні мясцовая адміністрацыя не звярталіся.
Сама Таццяна Тур у перспектыве плануе аднавіць зніклую скульптуру, але ў перспектыве. Бо кампазіцыя ўзнікла ў той час калі Таццяна ў мінулым годзе вучылася ў Вільні - цяпер дабрацца да сталіцы Літвы для аднаўлення скульптуры ёй складаней.
