У вёсцы Калышкі на Лёзненшчыне ўсталявалі помнік на месцы масавай гібелі габрэяў. Над Аршыцай зноў паламаўся ўнікальны падвясны мост.
Тым часам былы начальнік міні-футбольнага «Вітэну» падаў у суд на клуб, а сама каманда здабыла бронзавыя медалі чэмпіянату Беларусі.
Каля «Карабейніка» адбылася адчувальная аўтааварыя. Аршанец за тры гады змагаўся за сваё вока... ў судзе.
Таксама чытачоў нашага сайту цікавіла гістарычная старонка. Напрыклад, шмат хто не ведаў, што аршанцы бралі чынны ўдзел ва ўзвядзенні стадыёна «Дынама» ў сталіцы Беларусі. А Міхаіл Калінін, добра ўшанаваны ў Воршы, у нашым горадзе быў толькі гадзіну.
На вуліцы Шаўчэнкі знайшлі труп у падвале.
Тэлебачанне паказала несапраўдны заробак на «Лягмашы». Аршанка ж, якая адседзела ў турме за палітычныя пратэсты, выехала з Беларусі ў ЗША і расказала пра становішча вязняў і здзекі рэжыму Лукашэнкі з іх.
Вялікі ажыятаж сярод аршанцаў выклікаў прыезд у наш горад «імпартазамяшчальнага МакДональдса». А яшчэ жыхары Воршы разглядалі рэдкія аблокі над горадам.
Наш Ютуб-канал выпусціў відэа пра апошнюю загадку Караткевіча. Што за яна?
Былі і прыемнасці са свету спорту. Смалянец Дзмітрый Швядко стаў чэмпіёнам Расеі ў міні-футболе.
Новы раман пра Воршу «Гульні Цырцэі» прадставілі ў Варшаве на Hučna Fest.
