За домам № 20 па вуліцы Аршанскай у Барані размесціліся руіны сараяў. Калісці яны выкарыстоўваліся мясцовымі жыхарамі, якія скідвалі туды розную гаспадарчую драбязу, але з цягам часу драўляныя канструкцыі сталі не надзейнымі, людзі рэчы адтуль павынеслі, а сараі так і засталіся. Мясцовыя жыхары разумеюць, што такія аварыйныя канструкцыі могуць нанесці шкоду, а раптам туды залезе які-небудзь дзіцёнак! Таму фотаздымкі гэтых сараеў былі дасланыя ў рэдакцыю парталу tut.by.
13 кастрычніка на старонках самага папулярнага ў краіне сайта з’явілася публікацыя «Выбачайце, вы аблажаліся. Рамонты, за якія будаўнікам павінна быць сорамна» сярод якіх знайшлося месца і Бараньскім сараям. Праўда, аніякай рэакцыі ад камунальшчыкаў пасля публікацыі жыхары Барані не дачакаліся. Па стане на 29 кастрычніка небяспечныя аварыйныя сараі так і стаялі ў цэнтры гэтага гарадка.
