Калі ўбіваеш у гугле слова Орша, то на першым месцы, канешне, наш горад. Але ж калі глядзець ніжэй па рэйтынгу, то Оршаў, аказваецца, вялікая колькасць. Усе Оршы знаходзяцца на тэрыторыі Расеі ў арыале распаўсюду фіна-вугорскіх плямёнаў. Гэта падцверджвае адну з версіяў з'яўлення нашай назвы - ад Фіна-вугорскага слова, якое азначала сточная вада: так назвалі ў свой час Аршыцу, а потым назва і перкінулася на горад. Прыблізна такім жа чынам называліся і іншыя Оршы.
На днях у Цвярской вобласці з'явіўся яшчэ адзін населены пункт у якога ў корані будзе Орша. Гэта звязана са зменамі ў адміністратыўна-тэрытарыяльным дзяленні Калінінскай муніцыпальнай акругі. Пасля зменаў некаторыя назвы маглі б дублявацца, таму іх і пераймяноўваюць. Так, населены пункт Раманава цяпер стане Раманавым-на-Оршы, таму, што як і нашая Орша, знаходзіцца на рацэ з адпаведнай назвай.
