Адной з падзей жніўня стала заяўка аршанскага студэнта педагагічнага каледжа на адзіночны пікет. Але замест задавальнення свайго канстытуцыйнага права малады актыўны чалавек атрымаў паток пагрозаў ад адміністрацыі педкаледжа, на якую, у сваю чаргу, відавочна ціснулі зверху. Чыноўнікі разгарнулі стандартную, вядомую яшчэ з "нафталінавых" савецкіх часоў працэдуру запалохвання і падаўлення любой ініцыятывы і наўпроставага запалохвання неабыякавага маладзёна, які сапраўды хоча змяніць нешта ўнутры краіны.

У аўтапарку № 3 намеснік старшыні Віталь Цярэшчанка у інтэрв'ю журналістам адкрыта заявіў, што расейская мова застаецца прыярытэтнай для абвяшчэння прыпынкаў у грамадскім транспарце. А таксама сказаў, што хутка "Беларусь будзе аб'ядноўвацца з Расеяй". У любой іншай краіне чыноўнік быў бы звольнены за словы, якія нясуць яўную пагрозу незалежнасці краіны, аднак у Беларусі пры цяперашнім кіраўніцтве Цярэшчанка застаўся пры пасадзе. Акрамя таго, на просьбу журналістаў і грамадскіх актывістаў паказаць хоць бы адзін ліст са скаргамі на памылкі ў беларускамоўнай агучцы ад Цярэшчанкі было пачута маўчанне, якое доўжыцца не першы год.

Малодшы лейтэнант блізкага з Аршаншчынай раёна, участковы Мікалай Раеў у жніўні сеў у турму за збіццё двух затрыманых. А ў Оршы пачаўся збор подпісаў за забарону будаўніцтва на Задняпроўі чарговай праваслаўнай царквы, якіх у раёне і без таго дастаткова. Аднак разумення з боку ўладаў няма, яны далі РПЦ поўны карт-бланш распараджацца зямлёй.

Міліцыя ў гэтым месяцы пачала праверку, што ж за косткі былі знойдзеныя пры рамонтных працах на вуліцы Флёрава. А на самым пачатку месяца на вуліцы Салянікава ратавальнікі прадухілілі самагубства аршанкі. Гіпербалоідная вежа ў Коханаве набыла статус гісторыка-культурнай каштоўнасці, а ў Оршы на аўтакросе адбыўся няшчасны выпадак.