Летась па ўсёй Беларусі кошты на кватэры за гадавы перыяд упалі толькі ў Полацку і Наваполацку, а вось у Оршы быў рост. Праўда, адзін з самых невялікіх па краіне — на 1,6%. Меней раслі кошты толькі ў Гомелі, на 0,7%. Самым "ударным" па колькасці здзелак па куплі-продажы кватэр у нашым горадзе стаў трэці квартал. Было зафіксавана 165 здзелак, чацвёрты квартал таксама стаўся прадуктыўным, 156 здзелак.
Больш за ўсё ў Оршы быў попыт на 2-пакаёвыя кватэры — 41% агульнай колькасці, у цэлым па Беларусі менавіта 2-пакаёвыя кватэры самыя папулярныя. 39% цікавяцца 1-пакаёвымі кватэрамі, 16% былі патрэбныя 3-пакаёўкі, толькі 3% шукалі 4-пакаёвыя апартаменты, статыстыка realt.by. У сярэднім 1-пакаёўка ў Оршы каштуе ад 12,5 да 16,7 тысяч даляраў. За 2-пакаёўку выкладваюць ад 17,1 да 23,6 тысяч. Урэшце, за 3-пакаёўку ў Оршы даюць у сярэднім ад 23,2 да 27,4 тысяч. Сярэдні кошт за квадратны метр у горадзе 439 даляраў.
