Беларускі хакей працягвае "душыць" эпідэмія каронавіруса. Праўда, Федэрацыя хакею Беларусі, якую цяпер узначальвае колішні дзіцячы трэнер, генеральны дырэктар менскага "Дынама", набліжаны да Аляксандра Лукашэнкі Дзмітрый Баскаў, не робіць ніякіх саступак і працягвае залічваць паразы камандам, якія не з'яўляюцца на матчы з-за вялікай колькасці хворых хакеістаў. Сам Баскаў адзначыў, што на адмысловай сустрэчы прадстаўнікоў усіх хакейных клубаў нікога ад аршанскага "Лакаматыва" на ёй не было. А тады было пастаноўлена, што вірусныя інфекцыі не будуць падставай для адмены ці пераносу матчаў, зацверджаных першапачатковым календаром.
Такім чынам, на мінулым тыдні праз колькасць хворых у камандзе "Лакаматыў" не выйшаў на матчы з салігорскім "Шахцёрам" і менскім "Юнацтвам", а сёння, 29-га верасня, меўся сустракацца з "Магілёвам", але і на гэты матч каманда не выйдзе — каронавірус у 5 гульцоў "чыгуначнікаў" і ў 3 чалавек назіраюцца сімптомы хваробы. ФХРБ зноў прыняла рашэнне залічыць тэхнічную — ужо трэцюю — паразу аршанскай хакейнай камандзе.
