У нашым горадзе ў нядзелю, 4-га кастрычніка, не сабралася масавай акцыі супраць дыктатуры Лукашэнкі. Супрацоўнікі міліцыі арганізавана прыбылі на цэнтральную плошчу Оршы і нават выставілі свой аўтамабіль на стаянцы каля Прыдняпроўскага парку. Плошчу патрулявалі людзі ў цывільным і непасрэдна ў міліцэйскай форме. Аршанцы ўжо не першую нядзелю не рызыкнулі сабрацца разам, акцыя не адбылася. Раней некаторыя ўдзельнікі масавых акцый ужо атрымалі папярэджанні, штрафы і суткі зняволення. Але некаторыя праявы супраціву непрызнанаму Еўропай прэзідэнту і фальсіфікацыям выбараў усё ж можна было ўбачыць. У адным з чатаў з'явіўся фотаздымак з Цэнтральнага стадыёна Оршы, дзе на асвятляльнай мачце вывесілі нацыянальны бел-чырвона-белы сцяг. Калі на стадыён зрабіць больш якасны здымак быў адпраўлены наш карэспандэнт, акурат у гэты момант нацыянальны сімвал ужо здымалі з вышыні работнікі. Раней у жніўні-верасні нацыянальныя сцягі ўжо з'яўляліся ў розных месцах Оршы. У прыватнасці, у Чаромушках, на Задняпроўі і на шэрагу прыватных дамоў. І ўсё ж размах вывешвання нацыянальных колераў сярод аршанцаў не такі высокі, як у Менску, дзе штодня вывешваюцца дзясяткі нацыянальных сцягоў. Міліцыя, якая пакуль застаецца на баку Лукашэнкі, засцерагае ад падобных дзеянняў, якія парушаюць грамадскі парадак. І папярэджвае парушальнікаў аб штрафах і магчымых сутках.
