Памяшканне крамы пра якое ідзе гаворка для Оршы знакамітае — гэта адна з нешматлікіх крамаў, якая акрамя сваёй афіцыйнай назвы мае яшчэ і мянушкі. Напрыклад «Пасад» — па назве крамы, якая тут прабыла вельмі доўга, «ветэранскі» — таму што ў свой час тут прадстаўляліся вялікія ільготы для ветэранаў Другой Сусветнай вайны. І — самая арыгінлаьная — «Спасібо Гітлеру», бо паводле легенды сам будынак будавалі палонныя немцы, а калісці крама ноччу гандлявала алкаголем, за што ёй і дзякавалі мясцовыя аматары «дагнацца».
Пасля закрыцця дзяржаўнага «Пасада», які незважаючы на розныя адміністратыўныя падтрымкі — той жа гандаль алкаголем у начны час — так і не стаў прыносіць прыстойныя прыбыткі, тут адчынілася крама якая гандлявала рознай гаспадарчай драбязой. Але і «драбяза» пратрымалася не доўга і крама зноў была зачыненая. Цяпер крамай на скрыжаванні Леніна і Камсамольскай будзе валодаць «Дабраном». Гандлёвая сетка пакуль не паведамляе ці будзе тут традыцыйны «Дабраном» ці дыскаўнтэр гэтай жа сеткі «Капеечка», але зараз у краме ва ўсю ідзе рамонт і ўжо набіраюцца работнікі.
