Зачыненая кавярня «Лунг» — адзіная паўнавартасная кавярня ў раёне «Раніцы». Кавярня гэтая тут даўно, ёй валодае тая ж кампанія, што і каярняй «Віет» — звязаная з В’етнамскай дыяспарай Оршы. Але ў адрозненні ад «Віета», «Лунг» не атрымаў такой папулярнасці. «Раніца» — не самы прагулачны раён ды і кухня ў кавярні была даволі няўстойлівая, адна і тая страва магла быць у адзін дзень адной якасці, у другі дзень другой. З плюсаў «Лунга» — цудоўны інтэр’ер ва ўсходнім стылі, добрыя кактэлі.
Уладальнікі і раней хацелі зачыніць «Лунг» — у сеціве з’яўляліся абвесткі пра продаж і арэнду памяшкання, але пакупнік з’явіўся толькі зараз. Цяпер на месцы «Лунга» адчыняецца яшчэ адна «Пякарня».
Бачна мы маем новы трэнд у Оршы ў сферы грамадскага харчавання. Як у горадзе амаль адначасова адна за адной адчыняліся шаўрмічныя, так цяпер могуць адчыняцца пякарні, якія сапраўды для Оршы новая з’ява і карыстаецца попытам. Першая пякарня адчынілася на тэрыторыі былога піўзавода.
