Як шырока вядома, сваю першую прысягу пасля перамогі на выбарах прэзідэнта Рэспублікі Беларусь у 1994 годзе Аляксандр Лукашэнка прыносіў на Канстытуцыі, яшчэ не змененай ім на незаконна прызначаным рэферэндуме, і пад нацыянальным бел-чырвона-белым сцягам. Пазбегнуўшы вельмі магчымага ў першыя гады прэзідэнства імпічменту, Лукашэнка асмялеў, стары Вярхоўны Савет быў распушчаны, а дэпутаты апазіцыі, якія найбольш зацята выступалі супраць, на іх думку, пачатку дыктатуры, былі збітыя невядомымі ў будынку Парламента падчас галадоўкі. Неўзабаве Беларусь пазбавілася на афіцыйным узроўні нацыянальных сімвалаў, пра вяртанне якіх дзесяцігоддзямі ва ўмовах татальнай няволі марылі беларускія патрыёты. Сімволіка была зменена на постсавецкія чырвона-зялёныя сімвалы, якія толькі ў асобных элементах змяніліся ў параўнанні з перыядам Савецкай Беларусі.
Але, як паказалі падзеі 2020 года, беларусы не забылі нацыянальныя сімвалы свайго народа і ўсё актыўней і шырэй карыстаюцца імі на вуліцах. У Оршы рэгулярна адбываюцца вывешванні сцягоў ці малююцца графіці патрыятычнага зместу, з бел-чырвона-белым сцягам або гербам "Пагоня". Міліцыі не ўдаецца спыніць акцыі, нягледзячы на пагрозы завядзення нават крымінальных спраў за звычайныя надпісы. Ёсць і аршанцы, якія проста носяць БЧБ-значкі на адзенні ці стужкі нацыянальных колераў на заплечніках. Таксама ў Оршы былі заўважаны кофты з патрэтам... Лукашэнкі. Гэта афіцыйны здымак з прысягі пасля першых выйграных выбараў, дарэчы, адзіных, якія прызнала сусветная супольнасць і ўсе палітычныя сілы Беларусі. Паводле слоў арганізатараў у інтэрнэце, яны хочуць нагадаць Лукашэнку, пад якімі сімваламі ён, яшчэ малады, прысягаў на вернасць Беларусі і яе народу. Цяпер жа Лукашэнка ўжо шмат гадоў называе сімволіку "фашысцкай", а рэжымныя гісторыкі пішуць тэксты пра нібыта неўласцівасць гэтай сімволікі беларускаму народу.
Куртку з фатаграфіяй Лукашэнкі знайшлі і ў Гародні. Падобна, пачаўся беларускі флэшмоб
