РУП "Віцебскэнерга" адсправаздачылася аб працы ў папярэднія содні, энергетыкі працавалі нават у навагоднюю ноч, каб хутчэй падключыць жыхароў да электрычнасці. На сваёй старонцы яны распавялі пра маштабы аднаўленчай аперацыі.
Персанал РУП «Віцебскэнерга» працягвае працы па аднаўленні электразабеспячэння спажыўцоў у населеных пунктах, пацярпелых ад неспрыяльных умоў надвор'я.
У цэлым па Віцебскай вобласці за апошнія трое сутак было адноўлена электразабеспячэнне больш за 600 месцаў.
29 снежня ў рэгіёне назіраліся магутныя парывы ветру, ледзяны дождж і моцны галалёд. Драты ліній электраперадачы пакрыліся тоўстай ледзяной скарынкай, і абрываліся, не вытрымліваючы грузу. Ламаліся пад велізарнай нагрузкай нават жалезабетонныя апоры. Падалі дрэвы, прыводзячы да пашкоджання правадоў. Вельмі складаныя ўмовы надвор'я сталі прычынай ўзнікнення значнай колькасці адключэнняў на лініях электраперадачы Віцебскай вобласці.
Работнікі энергасістэмы Віцебшчыны загадзя былі пераведзены на рэжым павышанай гатоўнасці і адразу прыступілі да ліквідацыі наступстваў стыхіі. У РУП «Віцебскэнерга» быў створаны аператыўны штаб па правядзенні аварыйна-аднаўленчых работ. Для паскарэння выканання аварыйна-аднаўленчых работ быў прыцягнуты дадатковы персанал і тэхніка, у тым ліку з Глыбоцкіх і Полацкіх электрычных сетак, на месцы было арганізавана гарачае харчаванне для работнікаў. На дапамогу энергетыкам Віцебшчыны таксама прыбылі брыгады філіяла «Барысаўскія электрычныя сеткі» РУП «Мінскэнерга».
Найбольш пацярпелі з-за стыхіі Віцебскі, Аршанскі, Гарадоцкі і Лёзненскі раёны. Дзе дазваляла тэхнічная магчымасць, энергетыкі арганізоўвалі падлучэнне дызель-генератарных установак для аднаўлення электразабеспячэння доўга адключаных спажыўцоў. Аварыйна-аднаўленчыя работы працягваліся і ў навагоднюю ноч.
Па стане на 18-00 гадзін 1 студзеня аднаўленчыя работы працягваліся ў шэрагу населеных пунктаў Аршанскага, Гарадоцкага і Лёзненскага раёнаў. Лініі электраперадачы, якія ідуць да некаторых вёсак, персаналу энергасістэмы даводзілася адбудоўваць практычна зноўку. У працэсе ліквідацыі наступстваў стыхіі з ліній электраперадачы энергетыкі знялі некалькі тысяч паваленых дрэваў.
Цяпер працуюць 59 брыгад, 278 чалавек і 27 адзінак тэхнікі.
