У чэмпіянаце Беларусі па міні-футболе пачалася стадыя плэй-оф, у якой вызначацца чэмпіён і медалісты нацыянальнага першынства. Аршанскі «Вітэн» ідэальна правёў рэгулярны чэмпіянат, здабыўшы перамогі ва ўсіх праведзеных 22 матчах, забіўшы 134 галы і прапусціўшы ўсяго 37. Першае месца ў «рэгулярцы» дазволіла «чырвона-чорным» бесперашкодна выйсці ў 1/4 фіналу.
Супернік аршанцаў па чвэрцьфінале ў плэй-оф пачынаў з першага этапу — 1/8 фіналу. У матчы са светлагорскім ЦКК сталічныя футбалісты перамаглі 3:2.
«Вітэн» і «Мінск» сустракаліся ўсяго 4 разы, у 3 выпадках перамога заставалася за «энергетыкамі» і толькі аднойчы «чырвона-сінім» удалося пазбегчы паразы і згуляць унічыю.
Перад адказным паядынкам у склад «Вітэну» вярнуўся Андрэй Чурылін, аднак да канца сезону выбыў другі брамнік Максім Лысенка.
Сустрэча «Вітэна» і «Мінска» пройдзе 17 траўня ў аршанскім спартовым комплексе «Алімпіец». Пачатак а 19:30.
