Валейбольны клуб «Узлёт», які традыцыйна прадстаўляў Воршу ў мужчынскіх спаборніцтвах чэмпіянату Беларусі, рызыкуе не заявіцца на чэмпіянат краіны-2021/22. Як паведамляе блог «Радыё Аршыца», рызыка прыпынення дзейнасці клубу праз малы бюджэт, які выдзяляецца на валейбол у горадзе, існавала і дагэтуль, але заўсёды знаходзілася валявое рашэнне, якое дазваляла заявіцца на чэмпіянат. Аднак цяпер, відаць па ўсім, «Узлёт» сапраўды на чэмпіянат не заявіцца.
У мінулым сезоне «Узлёт» заняў 8-е месца ў Першай лізе чэмпіянату Беларусі. Лёс жаночай каманды «Кацюша» застаецца невядомым.
Найбольш драматычны момант у магчымым прыпыненні дзейнасці «Узлёту» ў тым, што сёлета каманда адзначае сваё 25-годдзе. Клуб-пераемнік легмашаўскіх традыцый валейболу яшчэ савецкага часу быў добра вядомым у горадзе і зазвычай збіраў поўныя трыбуны гледачоў, нягледзячы на імя суперніка і месца ў табліцы.
