Прадпрыемства гатова заплаціць за транспартныя паслугі каля 42 тысяч рублёў. Журналісты пацікавіліся на льнозаводзе, чаму вырашылі прывезці пражу з Кітаю.
Ільнокамбінат размясціў заяўку на сайце дзяржзакупак на дастаўку марскімі кантэйнерамі пражы з Кітаю. Арыентыровачны кошт — 42 340 рублёў. Аб’ём грузу — 60 кубаметраў, вага — 16 тон. Крыніца фінансавання — уласныя сродкі прадпрыемства.
Журналісту, які патэлефанаваў на камбінат як фізасоба, паведамілі, што льнозавод «робіць усю прадукцыю з беларускага лёну». Што да заяўкі на пастаўкі з Кітая, на прадпрыемстве ўдакладнілі:
«Вінныя былі нам трошкі, таму забралі іншай прадукцыяй — ніткай, для вытворчасці некаторыя фрагменты. Усё выпускаецца ў нас з беларускага лёну. Ні ў якім разе не кітайскі лён, усё беларускае. Мы возім беларускі лён. Гэта Любанскі льнозавод, Верхнядзвінскі, Слуцкі, „Карэлічылён“, „Гомельлён“. Усё ў нас з беларускага лёну. На заўтра-паслязаўтра вязем ад іх лет. І гэта робім увесь час».
Аршанскі льнозавод таксама размясціў заяўку на закупку 40 тон віскознай пражы. Арыентыровачны кошт — 562 тысячы рублёў.
