10 сакавіка адбылося паседжанне Камітэту па статусе і пераходах футбалістаў АБФФ. На ім разгледзелі заяву экс-футбалістаў «Воршы» Аляксея Хадневіча, Змітра Жданка, Сяргея Гігевіча і экс-трэнера каманды Юрыя Канаплёва ў дачыненні клуба. Зыходзячы з іх заявы, клуб не выканаў рашэнне Камітэту аб выплаце экс-футбалістам і трэнеру прэміяльных.
У выніку федэрацыя футболу прыняла рашэнне аб накладанні на «Воршу» забароны на трансферы — пераходаў гульцоў. Таксама было заяўлена, што наперадзе разгляд хадайніцтва аб нявыдачы клубу ліцэнзіі на ўдзел у першай лізе сезона 2022 года да ажыццяўлення выплат экс-футбалістам і трэнеру. Аднак ліцэнзію ўсё ж выдалі.
Пра тое, што вядучым у свой час гульцам каманды Хадневічу і Жданку не выплацілі абяцаных прэміяльных, было вядома яшчэ з інтэрв’ю самога Хадневіча некалькі гадоў таму. Канаплёў стаў самым паспяховым трэнерам «Воршы» ў незалежнай гісторыі, прывёўшы каманду ў 1/8 фіналу Кубка Беларусі і на 7-е месца ў Першай лізе — найвышэйшых дасягненняў сіня-белых з часоў абвяшчэння Беларуссю незалежнасці ў 1991-м.
