Больш за 20 дзён прайшло з моманту затрымання 19 красавіка лідараў і актывістаў незалежных беларускіх прафсаюзаў. Дагэтуль інфармацыі па справе пераследу прафсаюзных актывістаў следчыя органы не даюць.
Па стане на 10 траўня праваабаронцам «Вясны» вядома, што аднаго з затрыманых і змешчаных у СІЗА КДБ, былога кіраўніка незалежнага прафсаюза работнікаў радыёэлектроннай прамысловасці (РЭП) Генадзя Фядыніча перавялі ў СІЗА на Валадарскага ў Менску. Фядыніч быў затрыманы 19 красавіка падчас масавага «хапуна» прадстаўнікоў незалежных прафсаюзаў.
У Генадзя Фядыніча ў СІЗА абвастрыліся праблемы са здароўем — з-за стрэсу ўзровень цукру ў крыві амаль не збіваецца інсулінам.
Пераведзены на «Валадарку» і лідэр аршанскай ячэйкі незалежнага прафсаюзу РЭП Васіль Бераснеў.
Па папярэдняй інфармацыі іх абвінавачаваюць ва ўдзеле ў экстрэмісцкім фармаваньні (ч.1 арт. 361 Крымінальнага кодэксу).
Вядома таксама, што ў СІЗА КДБ вязням не перадавалі лістоў і перадач. Берасневу адмовіліся перадаць нават акуляры.
