Орша, Эканоміка

Мяркам усё

01.09.2022 11:28

1540 праглядаў, 0 каментароў

На месцы апошняй крамы сеткі Мяркам цяпер Капеечка

Першая камерцыйная гандлёвая сетка Аршаншчыны цалкам зачынілася. Яна ўзнікла яшчэ ў пачатку 90-х і стала першай лакальнай сеткай не падначаленай дзяржаве. А яе ўладальнік сеткі Мікалай Сінякоў шмат гадоў уваходзіў у топ самых уплывовых бізнэсоўцаў краіны, не мала сродкаў аддаючы на дабрачыннасць. У прыватнасці, ён стварыў у горадзе прыватную галерэю «Каляровы шлях», а ў пачатку 2020 года прафінансаваў будаўніцтва праваслаўнага храму ў раёне «Царскага сяла».

Апошняя крама сеткі — «Гасцінец» на Магілёўскай зачынілася адносна нядаўна, а прыблізна тыдзень таму на яе месцы адчынілася «Капеечка» іншай сеткі.

У прынцыпе некалькі год таму сетка ўжо перастала развівацца — не адчыняліся новыя гандлёвыя аб’екты, а старыя перадаваліся ў арэнду. Магчыма, што гэта запланаваны пераход з гандлёвага бізнэса ў чыстую здачу будынкаў пад гандаль. Але ж чуткі гавораць, што сетка зачыняецца па палітычных прычынах. Маўляў, і сам Сінякоў і яго сям’я падтрымала пратэсты 2020 года. Сам уладальнік бізнэсу не абвяшчаў пра закрыццё сеткі і пра прычыны гэтага кроку.