На мінулым тыдні па ўсёй краіне прайшла чарговая хваля затрыманняў і арыштаў па палітычных матывах. Асноўны іх пік прыйшоўся на чацьвер 16 сакавіка. Нам паведамляюць як мінімум пра 8 затрыманняў і больш за дзесятак вобшукаў. Гаворка ідзе пераважна пра адміністратыўныя справы. Людзей затрымлівалі за каментары ці апублікаваныя посты ў сацыяльных сетках зробленыя яшчэ ў мінулым годзе. Прысуджалі або вялікія штрафы, або па 15 сутак. Арышты адбываліся не толькі ў Оршы, але і ў раёне і нават у суседніх раёнах дзе раней рэпрэсіі былі чыста сімвалічныя, напрыклад, у Сененскім раёне.
Падобна на тое, што ў чацьвер па рэгіёну працавалі не толькі мясцовыя міліцыянты, але і прыехаўшыя з Магілёўскай вобласці. Як мінімум адзін затрыманы быў не грамадзянінам Беларусі. Хаця сёння нядзеля, паведамленні пра арышты нам усё яшчэ паступаюць. Падобна на тое, што гэта зачыстка перад Днём Волі, які адзначаецца 25 сакавіка ў гонар абвяшчэння незалежнасці Беларускай народнай рэспублікі. Рэпрэсіі рэзка ўзмацніліся на мінулым тыдні па ўсёй краіне, ужо можна гаварыць, як мінімум, пра пару соцень затрыманняў.
