На мінулым тыдні мы пісалі, што ў Аршанскім раёне назіраецца дзіўнаватая актыўнасць супрацоўнікаў "Энэргазбыту". Калі па ўсёй вобласці ад пачатку года да канца жніўня было выпісана 22 штрафы ў дачынені да кіраўнікоў прадпрыемстваў, то па Аршанскім раёне - 17, амаль 80%. Гаворка ідзе пра штрафы за непадпарадкаванне законным патрабаванням пасадовай асобы. Ва ўсіх гэтых выпадках кіраўнікі прадпрыемстваў, прынамсі, па пастановах судоў, не давалі энэргетыкам абрэзаць частку электрачнасці, якая ідзе на прадпрыемствы.

Сёння стала вядома яшчэ пра адзін суд супраць аднаго з кіраўнікоў Аршанскага КХП. За такое ж парушэнне, кіраўніку элеватара суд выдаў 74 рублі штрафу. З пастановы суда, які прайшоў яшчэ 21 верасня, бачна, што энэргетыкі хацелі абрэзаць электрычнасць пастаўляемую на прадпрыемства на 25%. Але мясцовае кіраўніцтва не прадставіла адпаведных работнікаў для гэтага.

Сітуацыя дзіўная не толькі вялікай статыстыкай штрафаў па раёне. Але яшчэ і тым, што КХП, прынамсі, пяць гадоў таму лічылася дастаткова паспяховым прадпрыемствам у параўнанні з іншымі харчовымі вытворцамі раёна. І дзіўна, што такому прадпыремству вырашылі зменьшыць пастаўку электрычнасці. Няўжо, сапраўды запазычанасць? Па-другое, гэта ўжо чацьверты штраф па падобным парушэнні для кіраўніцтва КХП.

Калі мы маем справу не з "дагаварняком" для выканання плану па штрафах, то, атрымліваецца, на КХП фінансавая сітуацыя стала вельмі кепскай. Але нешта дакладна сцвярджаць ва ўмовах схаванай статыстыкі цяжка.