Абвешчаныя выбары (парламенцкія і мясцовыя ў адзін дзень) не дадавалі ілюзіяў дэмакратычнасці. Ва ўмовах мацнейшых рэпрэсіяў і закрыцця ўсіх апазіцыйных партыяў ніхто не чакаў, што ў Саветы ці парламент пройдзе нехта з альтэрнатыўным меркаваннем. І хаця ўлады будуць імкнуцца стварыць бачнасць альтэрнатыўнасці выбараў, пакуль гэта атрымліваецца кепска.

Ужо распачаўся збор подпісаў за вылучэнне кандыдатаў і па дзвюх аршанскіх парламенцкіх выбарчых акругах (№ 25 і № 26) свае групы па зборы подпісаў зарэгістравалі па аднаму кандыдату. Па гарадской акрузе ў парламент вылучаецца дырэктар Ільнокамбінату Аляксандар Міхно. А па раённай акрузе старшыня Балбасаўскага пасялковага Савету Глеб Гулянкоў.

Канешне, яны не будуць адзіны кандыдатамі ў бюлетэнях — ім дададуць вылучэнцаў ад партыяў і, хутчэй за ўсё, у бюлетэняз будзе па 5 кандыдатаў. Але ж звычайна, тыя кандыдаты, якія рэальна хочуць, каб за іх прагаласавалі карыстаюцца магчымасцю збора подпісаў, каб пра іх хоць трохі ведалі людзі. Партыйныя вылучэнцы — чыста фармальныя, для стварэння бачнасці выбару.

Хаця адназначна сцвярджаць, што менавіта два названых кандыдаты стануць дэпутатамі пакуль рана. Усё ж такі, ўладам неабходна паказаць яшчэ і актыўную працу партыяў. Тым не менш, тое, што толькі па адным кандыдаце збіраюць подпісы — вельмі паказальна.