Генеральны дырэктар прадпрыемства «Аршанскі льнокамбінат» Алег Буянаў распавёў у інтэрв’ю віцебскай газеце «Віцьбічы» пра пашырэнне ўласнай гандлёвай сеткі заводу. Плануецца, што сёлета льнокамбінат адкрые 10 крамаў у расейскіх гарадах-мільённіках.
«Адным з першачарговых крокаў будзе развіццё ўласнай сеткі гандлю ўраздроб. 22 снежня мы адкрылі сваю першую краму ў Екацярынбургу.
Цягам наступных двух гадоў павінны адкрыць яшчэ дзесяць крамаў у гарадах-мільённіках Расейскай Федэрацыі», — сказаў гендырэктар Аршанскага льнокамбінату, адказваючы на пытанне аб прасоўванні прадукцыі прадпрыемства на расейскі рынак.
Другі важны кірунак, з ягоных словаў, — інтэрнэт-гандаль. Перад спецыялістамі прадпрыемства стаіць задача прасоўвання брэнду беларускага лёну. Буянаў паведаміў таксама пра планаваны рэбрэндынг гандлёвага знаку «Беларускі лён» і абяцаў удыхнуць у яго «новае жыццё».
Алег Буянаў зазначыў, што на сёння галоўныя канкурэнты Аршанскага льнокамбінату на сусветным рынку тэкстылю — кітайскія вытворцы, якія за год перапрацоўваюць 100 тыс. тонаў льнянога валакна. У Воршы — усяго 17 тыс. тонаў.
Каб дагнаць кітайцаў, Аршанскі льнокамбінат бярэ, паводле гендырэктара, «курс на аўтаматызацыю і рабатызацыю вытворчасці».
«Ручную працу заменяць разумныя машыны і рабатызаваныя лініі. Мы ўжо пачалі рэалізацыю праекту па ўсталяванні аўтаматычных лініяў для пашыву ручнікоў і пасцельнай бялізны, гэтыя лініі змогуць замяніць ручную працу швачак», — сцвярджае Алег Буянаў.
Акрэсліваючы планы на будучыню падчас выступу на паседжанні экспертна-кансультатыўнай рады ў Віцебску, Буянаў казаў, што прадпрыемства павінна выйсці на экспарт у 35 краінаў свету і атрымаць выручку на суму 65 млн долараў.
Аршанскі льнокамбінат, у склад якога ўваходзяць шэсць фабрык, вырабляе тканіну, абрусы, сурвэткі і г. д. У Беларусі на сёння працуе 31 фірмовая крама льнокамбінату.
Заводы Беларусі, у прыватнасці ў Воршы, пасьля пачатку вайны Расеі супраць Украіны, з-за заходніх санкцый пазбавіліся шматлікіх замоваў у Еўропе і на іншых кантынентах. Аднак істотна вырасла колькасць разнастайных заказаў з Расеі.
