Як дзяржава ні стараецца, Аршанскі ільнокамбінат усё яшчэ ў кепскім фінансавым стане. 23 студзеня урад прыняў пастанову пра чарговую падпорку для прадпрыемства. Гаворыцца пра дзве дапамогі. Першая - кампенсацыя "Беларусбанку". Банк выдаў Ільнокамбінату крэдыт на будаўніцтва службовага жылля, але, бачна, не разлічыўся. У выніку ў пройгрышы аказаўся банк, якому грошы цяпер пойдуць з бюджэта. Другая дапамога - кампенсацыя працэнтаў па іншым крэдыце. Крэдыт быў узяты на мадэрнізацыю і пашырэнне вытворчасці, што ў звычайнай сітуацыі павінна прынесці дадатковы даход - для гэтага крэдыты і бяруцца. Але, бачна, нешта пайшло не так, калі прадпрыемства пашырыўшы вытворчасць не змагло заплаціць працэнты па крэдыту.
Увогуле Ільнокамбінат хранічна датацыйнае прадпрыемства. Па стане на 2022 год ён "з'еў" 200 мільёнаў даляраў бюджэтных сродкаў за папярэднія 10 гадоў. І пры гэтым меў яшчэ шэраг ільготаў, у прыватнасці па кошце на электрычнасць. У сітуацыі не было б нічога кепскага, калі б Ільнокамбінат быў выключэннем. Але ж шмат дзяржаўных прадпрыемстваў рэгулярна атрымлівае датацыі, кампенсацыі крэдытаў, іншыя ільготы ад дзяржавы. Каб пакрываць гэтыя выдаткі дзяржава сама вымушана бораць крэдыты, або прымушаць прадпрыемствы браць знешнія крэдыты. У выніку па стане на сярэдзіну мінулага года агульная (і дзяржава і дзяржаўныя прадпрыемствы ды банкі) знешняя запазычанасць Беларусі скала амаль 37 мільярдаў даляраў. І гэта пры тым, што бюджэт краіны ўсяго 12 мільярдаў даляраў. А па так званым "Еўрабондам" дзяржава ўвогуле тэхнічны банкрот.