Нягледзячы на тое, што «дынаміка адгрузкі беларускіх тавараў у краіны ЭЗ праз санкцыі запаволілася», прадукцыя канцэрна «Беллегпрам» экспартуецца ў Нямеччыну, Францыю, Бельгію, заявіла старшыня аб’яднання Таццяна Лугіна ў эфіры тэлеканала СТБ 4 лютага.
Паводле яе, большая частка прадукцыі лёгкай прамысловасці экспартуецца ў Расею, Азербайджан, Узбекістан, Таджыкістан — агулам у 95 краін.
У 2024-м годзе ў расейскіх гарадах хочуць адкрыць 8 крам беларускіх тавараў «Да дому», паведаміла Лугіна. Першую такую краму адкрылі летась у канцы снежня ў Екацерынбургу, другую — у Новасібірску.
«Беларускі гандаль будзе кропкава развівацца і ў іншых расейскіх гарадах», — сказала Лугіна.
З усіх прадпрыемстваў найбольшую папулярнасць за мяжой, паводле чыноўніцы, мае льняное адзеньне «Аршанскага льнокамбіната» і посуд «Добрушскага фарфоравага заводу».
