Рэдакцыя Orsha.eu першай даведалася і паведаміла ў Тэлеграм пра жудасную трагедыю, якая адбылася сёння ў горадзе. Ужо цяпер вядомыя пэўныя дэталі кашмарнай сцэны, якая разыгралася ў адной сям’і.
Знойдзеныя трупы чатырох чалавек, усе яны — малыя дзеці. Следчыя працуюць на месцы злачынства. Распачата крымінальная справа.
Дзеці — ва ўзросце ад 1 да 8 гадоў, на іх целах — прыкметы гвалтоўнай смерці. Паводле папярэдняй інфармацыі, да здарэння можа мець дачыненне 36-гадовая маці.
Здарэнне афіцыйна пацвердзіў Следчы камітэт.
Проста цяпер, у гэтыя хвіліны на месцы працуюць следчыя абласнога апарату і супрацоўнікі міліцыі. З выкарыстаннем магчымасцяў перасоўнай крыміналістычнай лабараторыі і прыцягненнем спецыялістаў Дзяржаўнага камітэту судовых экспертыз праводзіцца агляд, фіксуюцца і збіраюцца сляды, — усё, што мае хоць нейкае значэнне для следства. Працу на месцы каардынуе начальнік УСК па Віцебскай вобласці Аляксандр Гуцко.
Распачата крымінальная справа па ч. 2 арт. 139 (забойства дзвюх і больш асоб, учыненае ў дачыненні малалетніх) Крымінальнага кодэксу Рэспублікі Беларусь.
Маці дзяцей затрымалі, з удзелам аршанкі праводзяцца следчыя дзеянні. На месца здарэння накіравана следчая група цэнтральнага апарату Следчага камітэту, якая прыме крымінальную справу да сваёй вытворчасці.
Асабліва адзначаецца, што ход расследавання цяжкой крымінальнай справы на асабісты кантроль узяў старшыня СК Дзмітрый Гара.
Больш шырокія дэталі трагедыі, інфармацыя пра хаду расследавання — раніцай 15 лютага.
