Са сваіх пасадаў знятыя доўгажыхары Аршанскага выканкаму: Андрэй Загурскі - начальнік аддзела адукацыі, які правёў на гэтай пасадзе амаль 15 гадоў, і Віктар Калачоў - даўгі час працаваў кіраўніком справаў выканкаму, а апошнім часам быў намеснікам старшыні выканкаму.
Абодва страцілі свае пасады з-за трагедыі, якая адбылася на вуліцы Завадскага, калі шматдзетная маці забіла сваіх чацвярых дзяцей. Генеральная пракуратура абяцала знайсці вінаватых у тым, што дзяцей не забралі з сям'і раней. Бачна, што вінаватымі сталі начальнік адукацыі і намеснік старшыні выканкаму, які курыраваў гэтую сферу.
Пакуль абодва чыноўнікі прысутнічаюць на сайце выканкаму, хаця, па нашай інфармацыі, Калачоў ужо плануе ісці работаць у Аршанскі механіка-эканамічны каледж. Можна дадаць, што абодва чыноўнікі мелі дачыненне да выбараў. Калачоў ад імя выканкаму курыраваў многія выбары, а падначаленыя Загурскага рэгулярна станавіліся асновай выбарчых камісіяў.
