Канец сакавіка ў нашым «палестынах» выдаўся досыць цёплым, нязвыкла цёплым для гэтага месяца. 31 сакавіка былі пабітыя два тэмпературныя рэкорды ў нашым рэгіёне па «гарачыні». Тэмпература ў Воршы, зафіксаваная на метэастанцыі, дасягнула 23,1 градусу, што пабіла рэкорд для нашага горада і паўтарыла лічбы абсалютнага рэкорда сакавіка ў Беларусі, які стаяў да 2024 году. Ён таксама раўняўся 23,1 градуса і быў усталяваны ў Лельчыцах на поўдні краіны 19 сакавіка 1990 году.
Толькі на дзвюх станцыях у Віцебскай вобласці тэмпература паветра была 31 сакавіка ніжэйшай за 23 градусы — у Езярышчы і Расонах. Абодва мястэчкі месцяцца на самай поўначы краіны.
Акрамя таго, тэмпературны рэкорд усталяваны ў Сянне. Там было яшчэ цяплей, чым у Воршы — 23,8 градуса.
Цяплей за ўсё ў заключны дзень сакавіка 2024 году было ў Полацку — у найстаражытнейшым горадзе краіны зафіксавалі 24,2 градуса па шкале Цэльсія.
