Сёння - 29 траўня - Аляксандар Лукашэнка наведвае Оршу, у прыватнасці завод "Легмаш". Калі звычайна візіты Лукашэнкі мала абмяркоўваюцца, то гэты, бачна, з'явіцца ў трэндах. Што праўда, галоўны інфармацыйны повад будзе звязаны не з палітычнымі заявамі - палітычныя заявы ад Лукашэнкі даўно не ў трэндзе. Галоўным героем абмеркаванняў, вангуем, стане сякера. Для таго, каб у Беларусі зрабілі першыя сякеры ўладам давялося аб'ядноўваць намаганні двух "прамысловых гігантаў" - паведамляе "Пул Першага": кіруючай кампаніі "Гарызонт" і "Мінскага трактарнага завода". Супольнымі намаганнямі яны змаглі распрацаваць узор сякеры, які і быў прадэманстраваны Лукашэнку на Легмашы.
Але гэта яшчэ не ўся гігантаманія вакол вынаходніцтва сякеры. Цяпер на "Легмашы" павінны наладзіць масавы выпуск сякераў. І, каб усё атрымалася, кантраляваць працэс запуска вытворчасці будзе ажно Камітэт дзяржаўнага кантролю. Прадказваем у бліжэйшы час з'яўленне мемаў у сеціве на тэму вынаходніцтва сякеры "прамысловымі гігантамі" і кантроль за яе лёсам.
