Міліцыя папярэджвае аршанцаў пра новую махлярскую схему, якую пачалі выкарстоўваць злачынцы. Пра новую схему аршанскія міліцыянты распавядаюць у рамках "Дэкады кібербяспекі". Хаця пра падобныя злачынствы на Аршаншчыне пакуль не паведамлялася, але мы палічылі патрэбным таксама распавесці пра схему, каб нашыя чытачы не патрапіліся на яе.
Махляры званяць на мэсэнджэры (тут варта ўжо мець на ўвазе, што работнікі афіцыйных установаў у камунікацыі з кліентамі не карыстаюцца мэсэнджэрамі) пад выглядам супрацоўнікаў Фонда сацыяльнай абароны насельніцтва - махляры ўпершыню прадстаўляюцца ад імя гэтай арганізацыі. Далей яны гавораць, што для атрымання пенсіі трэба ўсталяваць адпаведную праграму на свой гаджэт. У адваротным выпадку, чалавек не зможа атрымаць пенсію. А праграма, аказваецца, шкоднай і чалавек праз яе можа страціць свае грошы.
Варта разумець, што аніякія праграмы не ўплываюць на выплату пенсіяў, ФСЗН такія праграмы не ствараў і мэсэнджэрамі работнікі ФСЗН карыстаюцца толькі ў выключных выпадках.
