Пракуратура незадаволеная ўмовамі ўтрымання жывёл у арганізацыях сельскай гаспадаркі Віцебскай вобласці і занепакоеная смерцямі жывёлаў. Дакумент аб гэтым ведамства адправіла ў аблвыканкам. З дапамогай BELPOL ён апынуўся ў распараджэнні «Люстэрка».
Прадстаўленне (акт пракурорскага нагляду, у якім змяшчаюцца патрабаванні аб устараненні парушэнняў заканадаўства, прычын і ўмоў, якія садзейнічаюць гэтым парушэнням) склала пракуратура Віцебскай вобласці. Дакумент за подпісам намесніка пракурора вобласці Дзяніса Шапавалава адправілі ў аблвыканкам 9 кастрычніка.
Найбольшыя страты ў Верхнядзвінскім раёне — 260 галоў. У спісе праблемных і Лёзненскі — 107 галоў.
«Практычна ў кожнай другой сельгасарганізацыі сітуацыя з падзяжом пагаршаецца ў выніку элементарнай безгаспадарчасці і грубых парушэнняў вытворча-тэхналагічнай дысцыпліны», — паведамілі ў пракуратуры.
Пракуратуру непакояць умовы, у якіх утрымліваюцца жывёлы. Напрыклад, падчас праверкі на жывёлагадоўчым комплексе «Маяк» у Вушацкім раёне каровы проста «ляжалі ў гнаявой жыжцы». Таксама «загноенымі» аказаліся стойлы на фермах у аграгарадках Ляды і Арловічы Дубровенскага раёну і ў сельскагаспадарчым філіяле Аршанскага камбіната хлебапрадуктаў у аграгарадку Буда.
Крымінальную справу завялі на намесніка дырэктара філіяла «Талачынскія сыры» ААТ «Аршанскі мясакансервавы камбінат». Па версіі пракуратуры, ён загадаў падначаленым унесці «загадзя ілжывыя звесткі» ў афіцыйныя дакументы, прадставіўшы дзвюх памерлых жывёл як прададзеных. Цяпер мужчыну абвінавачваюць па ч. 2 арт. 424 КК (Злоўжыванне ўладай ці службовымі паўнамоцтвамі).
