Урад Смаленскай вобласці Расеі прапрацоўвае з беларускім бокам пытанне аб чыгуначных зносінах паміж Смаленскам, Віцебскам і Воршай без перасадак. Пра гэта піша агенцтва «Пра што кажа Смаленск».
Як растлумачыў губернатар Смаленскай вобласці Васіль Анохнін у ходзе прамой лініі, гэтыя напрамкі перавозак вельмі актуальныя як для смалян, так і для жыхароў Беларусі.
«На дадзены момант мы датуем гэтыя маршруты са сродкаў бюджэту. На жаль, мы не можам зрабіць датацыю за межамі Расеі, таму неабходная перасадка на мяжы», — расказаў кіраўнік рэгіёну.
Раней губернатар узняў дадзеную тэму на абмеркаванні з паслом Расеі ў Беларусі Барысам Грызловым падчас рабочага візіту ў Менск. Як адзначалася пасля сустрэчы сухой дыпламатычнай мовай, «ініцыятыва сустрэла цікавасць беларускіх калег».
10 гадоў таму быў аўтобусны маршрут Ворша — Смаленск, але затым, як заявіў смаленскі бок, яго скасавалі праз віну беларускага боку. Акрамя таго, абмяркоўваўся турыстычны маршрут па Дняпры з магчымасцю даплысці са Смаленску да Воршы і назад. Аднак і гэтая ініцыятыва не атрымала працягу.
Перамовы паміж Беларуссю і Расеяй у пытанні бесперасадачных пасажырскіх перавозак з Воршы ў Смаленск ужо нагадваюць перамовы дзвюх краін аб роўмінгу, дакладней яго адмене. Размовы аб гэтым вядуцца ў так званай «Саюзнай дзяржаве» ўжо некалькі гадоў, ды і пытанне не выглядае шматэтапным. Аднак яго рашэнне аказалася для чыноўнікаў абедзвюх краін вельмі складаным, нават невыканальным.
