Ужо сярэдзіна снежня, але зімовае надвор'е то прыходзіць у Оршу, то зноў адступае пад уплывам пацяпленняў. На гэтым тыдні зіма прадпрымае чарговую спробу ўвайсці ў свае календарныя правы.
У ноч з 10 на 11 снежня пахаладала па ўсёй вобласці. Найбольш халодна ў гэтую ноч было ў Лепелі і ў мясцовым запаведніку - да мінус 5,1 градусы. На другім месцы суседняе Сянно - мінус пяць градусаў як і ў Езярышчы, Докшыцах і Віцебску. Оршу таксама не абыйшло пахаладанне - мінус 4,9 і трэцяе месца па нізкасці слупка тэрмометра.
А калі тэмпература каля 5 градусаў мароза вам падаецца не зусім зімовай, то "парадуем" вас набліжэйннем яшчэ адной хвалі холада. Заўтра ў пятніцу 13 снежня ў нашым рэгіёне зноў пахаладае. Тэмпература можа апусціцца да 8 і, нават, да 12 градусаў холаду. А па ўсходняй частцы вобласці - па нашай частцы будзе яшчэ і ветрана. Сіноптыкі чакаюць вецер да 20 метраў у сякунду. І, канешне, вецер будзе халодным. Таму сіноптыкі абвяшчаюць на пятніцу аранжавы ўзровень небяспекі.
