Як мы пісалі раней, у пачатку студзеня жыхары райцэнтра знайшлі ў лесапаласе труп сабакі, павешанага на дрэве. Лёзненскі РАУС правёў праверку, і высветліў, што з жывёлай расправіўся жыхар Лёзна.
Паводле яго тлумачэнняў, сабака быў бяздомным, і ён яго падкормліваў. Але суседзі скардзіліся на тое, што жывёла бегае па іх агародах і настойвалі, каб новы гаспадар заняўся выхаваннем сабакі, раз прывучыў яе да дома. 48-гадовы мужчына вырашыў пазбавіцца ад "праблемы"…
Гэты факт шырока абмяркоўваўся як у мясцовых інтэрнэт-рэсурсах, так і жыхарамі іншых раёнаў.
Тым не менш, крымінальнай справы супраць лёзненца заводзіць не сталі: пракуратура вырашыла, што ў яго дзеяннях не было хуліганскіх, карыслівых альбо іншых нізінных прычын.
Аднак за жорсткае абыходжанне з жывёлай, якое пацягнула яе гібель, мужчына быў пакараны ў адпаведнасці з ч. 3 арт.16.29 Кодэкса Рэспублікі аб адміністрацыйных правапарушэннях. Суд Лёзненскага раёна пастанавіў, што дастатковым пакараннем за зробленае будзе арышт на 7 сутак.
