Супрацоўнікі ўпраўлення па барацьбе з эканамічнай злачыннасцю пры сілавой падтрымцы АМАПу затрымалі групоўку, якая арганізавала “крадзеж з мясаперапрацоўчага прадпрыемства”, паведаміў Telegram- канал “МВД Беларуси”. Назва прадпрыемства не згадваецца, але на кадрах відэа, якое суправаджае аповед прадстаўніка УБЭП, пазнавальны Аршанскі мясакамбінат.

Паводле Вадзіма Гердава, намесніка начальніка Віцебскай абласной структуры УБЭП МУС, 46-гадовы майстар цэха арганізаваў злачынную дзейнасць разам са сваім былым 40-гадовым падначаленым. Задачай першага было “стварэнне лішкаў” мясной прадукцыі, якія складаліся ў вентыляцыйнае акно з выхадам на вуліцу. Дзейнічаць яму дапамагалі калегі з прадпрыемства, а таксама сваякі, якія забіралі скрадзенае. Усяго былі затрыманыя 11 чалавек ва ўзросце ад 17 да 59 гадоў. Яны дзейнічалі настолькі зладжана, што ўсяго за адну ноч вывезлі сотні кілаграмаў мясных вырабаў, піша Telegram- канал. Усё скрадзенае злодзеі падзялілі і былі затрыманыя разам з “набыткам”.

Следчы камітэт распачаў крымінальную справу паводле ч.2 арт. 210 КК РБ ( крадзеж шляхам злоўжывання службовымі паўнамоцтвамі, здзейснены групай асобаў па папярэдняй дамове). Фігурантам пагражае абмежаванне або пазбаўленне волі на тэрмін ад 2 да 7 гадоў.

Вядома, што на аршанскім мясакамбінаце крадзяжы - справа не рэдкая, і нават можна сказаць, што частая. “Росквіт” гэтага “бізнесу” прыйшоўся на галодныя 1990-я, калі мяса і кілбасу выносілі з прадпрыемства самымі разнастайнымі спосабамі, у тым ліку “на сабе”- пад адзеннем. Але нават у тыя часы не было чуваць, каб міліцыя затрымлівала “мясныя банды” у такім шырокм складзе. Тым больш - з сілавой падтрымкай узброенага АМАПу.