Гэта не жарт. У аршанскай паліклініцы № 5 такім чынам збіраюцца адзначыць 80-годдзе перамогі ў Вялікай Айчыннай вайне. «З экранаў тэлевізараў будуць гучаць песні ваенных гадоў у выкананні работнікаў медустановы», — піша газета «Витебские вести». Якім чынам гэта будзе зроблена тэхнічна, дзе паставяць тыя тэлевізары і ў які дзень чакаць спеваў, не тлумачыцца.

СМІ паведамляе, што кожная паліклініка ў Оршы правядзе ў сябе нешта падобнае. Так, у паліклініцы № 1 сіламі медперсаналу абсталявалі музейны куток, дзе экспануюцца сямейныя рэліквіі і прадметы побыту 1940-х. Паліклініка № 2 рыхтуе «тэматычную інсталяцыю з фотаздымкамі ўдзельнікаў вайны -былымі супрацоўнікамі медустановы».

Кожную з аршанскіх паліклінік абавязалі зрабіць нешта мастацка-патрыятычнае да ўгодкаў перамогі. Зразумела, у вольны час і без аплаты. Але такім чынам будзе прадэманстраваны «здаровы ідэалагічны клімат» у калектыве.

Што да пацыентаў, то яны ходзяць у паліклініку, як вядома, не дзеля забаваў. Ад такіх установаў чакаюць іншага — якаснага медычнага абслугоўвання. А яно зусім не такое, як можна меркаваць з раскладу працы спецыялістаў, прыкладам, той самай паліклінікі № 5. Лекар-уролаг там прымае раз на тыдзень на працягу менш як дзвюх гадзін, кардыёлаг — толькі 4 дні на тыдзень, оталарынголага няма зусім, і пацыентаў запісваюць на прыем у паліклініку № 6.

Увогуле ў паліклінічнай сістэме Оршы востра патрабуюцца урачы агульнай практыкі, оталарынголаг, педыятр, кардыёлаг, неўролаг, афтальмолаг. Спевакі і музейныя супрацоўнікі у спісе вакансій не згадваюцца.