Намеснік старшыні Беларускай федэрацыі шашак Аляксандр Уладзіміравіч Анісько пагадзіўся адказаць на пытанні карэспандэнта orsha.eu.
— Летась першы чэмпіянат свету праходзіў у Слоніме, а сёлета ўжо ў Оршы. Чаму выбар арганізатараў два гады запар крануўся Беларусі?
— Наогул, Міжнародная федэрацыя шашак (ФМЖД) заўсёды спрабуе разводзіць міжнародныя турніры па розных краінах. Але на гэты раз зрабілі выключэнне. Усім вельмі спадабалася, як прайшоў турнір у Слоніме, таму вырашылі яшчэ раз завезці чэмпіянат у Беларусь. Для правядзення была абрана Орша. Усе матчы турніру праходзілі ў ДзЮСШ №2.
— Дзе пражывалі ўдзельнікі турніру? — Яны і пражывалі, і харчаваліся ў гатэлі "Орша".
— Для шашыстаў была арганізаваная культурная праграма? — Вядома, абавязкова, як і запланавалі. Арганізатары зладзілі для шашыстаў вялікую экскурсію па Оршы, а таксама вазілі іх на Магілёўшчыну. Уражанні юных шашыстаў былі толькі станоўчыя, ім спадабалася паездка.
— Якія праблемы былі ў арганізацыі турніру? — Не магу сказаць, што мы сутыкнуліся з нейкімі невырашальнымі праблемамі. Буйных цяжкасцяў не было, былі асобныя пытанні, якія мы вырашалі. Адзінае, што планавалася правесці спаборніцтвы не ў ДзЮСШ №2, а ў Лядовым палацы. Але нам паведамілі, што ён яшчэ не адкрыты, таму не давялося там згуляць. Мы цалкам задаволеныя, як нас сустракалі ў Оршы, як дапамагалі вырашаць усе пытанні. Магу адзначыць, што ў Оршы прымаючы бок паставіўся да правядзення турніру з яшчэ большым энтузіязмам, чым год таму гэта было ў Слоніме.
— Ці вызначылася Міжнародная федэрацыя, дзе пройдзе наступны чэмпіянат? — Не, яшчэ не вызначалася, таму што каляндар вызначае Генеральная асамблея арганізацыі. Яна збярэцца пазней і назаве месца, куды юныя шашысты адправяцца ў 2014 годзе. Пакуль заяўка паступіла ад Эстоніі. А на 2015 год завязваецца канкурэнцыя: паступілі дзве заяўкі, адна з Польшчы, другая з Галандыі.
— Аляксандр Уладзіміравіч, чаму геаграфія турніру не самая поўная? — Ведаеце, у першую чаргу гэта звязана з узростам. Часта бацькі баяцца кудысьці адпускаць сваіх дзяцей, яны ж яшчэ маленькія... На дарослым узроўні, безумоўна, геаграфія пашыраецца. Плюс да ўсяго ў Італіі, Францыі, Бразіліі і многіх іншых краінах, дзе развіваюцца шашкі, існуе клубная сістэма, і там асобна вырашаюць, куды адпраўляць і не адпраўляць шашыстаў кадэцкага ўзросту. Пакуль на першых двух чэмпіянатах свету гульцоў з гэтых краін не было.
