У інтэрв'ю вядомаму спартоваму сайту "Трыбуна" ветэран "Оршы" распавёў пра тое, што клуб рыхтуецца да новага сезону ў добрых умовах, але ёсць праблема са складам каманды. Старт сезону ў 1-й лізе намечаны на 18 красавіка, але "сіне-белыя" да гэтага часу не ўзмацніліся дасведчанымі гульцамі з боку. Хутчэй за ўсё, "Орша" будзе разлічваць выключна на сілы гульцоў з Оршы і Барані, прычым вялікая іх частка - юныя футбалісты, а застацца ў 1-й лізе з такім складам будзе праблематычна.
- Як ідуць справы з падрыхтоўкай да гэтага сезону?
- Ня ведаю, што будзе далей, але з леташняга складу ў камандзе засталося 6 чалавек, а астатняе - моладзь. І тое, трэніруемся на энтузіязме, бясплатна. Ня ведаем, кантракты будуць ці ня будуць. А для таго, каб гуляць у першай лізе, патрэбныя дасведчаныя хлопцы, а так можна будзе здымацца пасля першага кола. А хто да нас паедзе, калі па кантрактах плацяць 2 мільёны і харчаванне.
- А ўмовы для трэніровак задавальняюць?
- У гэтым годзе ўмовы вельмі добрыя. Хоць прыезджыя хлопцы незадаволеныя, таму што яны жывуць у гасцініцы, дзе нельга сабе прыгатаваць есці. Ім даводзіцца харчавацца вермішэллю хуткага прыгатавання і іншай лухтой. І з экіпіроўкай пэўныя праблемы. Я лічу, каманда, калі разам, павінна быць у аднолькавых касцюмах. Каб відаць было, што гэта каманда. А ў нас, хто ў шортах, хто ў штанах, хто ў футры. Яшчэ адной праблемай з'яўляецца адсутнасць уласнага аўтобуса. Мы неяк ездзілі на выправу, так па дарозе тры разы кола прабілі. За намі потым прыехаў аўтобус каманды суперніка.
