Падрыхтоўка ФК "Орша" да новага сезону адбываецца ня лепшым чынам. 14 сакавіка "сіня-белыя" меліся ехаць у Смалявічы на таварыскую сустрэчу з мясцовым клубам. Аднак наш клуб так і ня выехаў з роднага горада. Прычына - адсутнасць аўтобуса. Адказныя за забеспячэнне клуба, верагодна, не знайшлі транспартны сродак нават у не такі далёкі горад. Паводле інфармацыі, якую мае наш сайт, гульцы "Оршы" ездзілі на таварыскія сустрэчы ў Магілёў і Наваполацк за ўласны рахунак, а ў Смалявічы ўжо не быў знойдзены аўтобус.
Старт сезону-2015, у якім "Орша" ўпершыню за 10 гадоў будзе выступаць у 1-й лізе чэмпіянату Беларусі, прызначаны на 18-га красавіка. Многія клубы 1-й лігі праводзяць роўную падрыхтоўку да афіцыйных гульняў, "Орша" пакуль ня можа сабе гэтага дазволіць. Больш за тое - у камандзе засталіся толькі 6 футбалістаў мінулагодняга складу, астатнія гульцы - юныя футбалісты, якія ня маюць вялікага досведу.
За зіму "Оршу" пакінуў шэраг лідэраў, у прыватнасці, асноўны цэнтральны абаронца Павел Тарасенка, адзін з ключавых футбалістаў цэнтра поля Андрэй Ламакі, а таксама лепшы бамбардзір клуба Аляксандр Лужанкоў.
