Як гаворыцца ў афіцыйнай пастанове Міністэрства эканомікі, гранічна максімальныя цэны на хлеб жытні і жытна – пшанічны, булачныя вырабы з пшанічнай мукі з утрыманнем цукру і тлушчаў не вышэй за 14 працэнтаў выраслі на 10 працэнтаў. Таксама на 10 працэнтаў падаражэлі мяса куранят-бройлераў і курыныя яйкі. Цэны на малочныя прадукты выраслі ў залежнасці ад іх тлустасці. Дарэчы, на іх прадугледжана падвойнае падаражанне – у лістападзе і снежні.
Хутка гэтыя жыццёва неабходныя гатункі могуць стаць недаступнымі для сярэдне забяспечаных аршанцаў, у тым ліку і пенсіянераў. Як вядома, у Оршы заработная плата - адна з самых нізкіх у вобласці. Па дадзеных Белстату сярэдняя зарплата ў Аршанскім раёне за студзень – жнівень склала крыху больш за 4 мільёны рублёў. А ў рэальнасці яна складае на многіх прадпрыемствах яшчэ менш. Напрыклад, бухгалтар-рэвізор на льнокамбінаце зарабляе 3.600 тысяч рублёў, прадавец у Юрцаве – 3 мільёны, а повар – 2.500 тысячы, прыбіральшчык у спецкамбінаце – 3 мільёны і г.д. У бізнесе у цэлым заробкі вышэйшыя, але не намнога. Таму многія аршанцы выязджаюць на заробкі ў іншыя краіны, у большасці ў Расію. Там цэняцца спецыялісты і заробкі вышэй.
