У 2007 годзе сярод грамадскіх актывістаў рэгіёна востра адчувалася адсутнасць сродкаў масавай інфармацыі, якія былі б пляцоўкай для кантакту ініцыятыўных грамадзянаў з шырокай аўдыторыяй і пляцоўкай для абмеркавання праблемаў рэгіёна. Папярэднія спробы стварыць незалежныя СМІ, якія маглі б стаць такой пляцоўкай выклікалі актыўнае супрацьдеянне ўлады. Усе незалежныя газеты, якія спрабавалі выдавацца ў Оршы былі зачынены (напрыклад, "Куцейна", аршанскі выпуск "Віцебскай Трыбуны", "Телевестник"), спробы скарыстацца рэгістрацыяй камерцыйных выданняў для стварэння асобнага аршанскага навіновага выпуска спыняліся пасля размоваў з выдаўцамі прадстаўнікоў улады. Было зразумела, што выдаваць незалежную газету ў Оршы не атрымаецца.
У 2006 годзе адначасова ў некалькіх чалавек пачала фармавацца ідэя стварыць незалежнае рэгіянальнае СМІ не ў выглядзе газеты, а ў інтэрнэт прасторы. І ўжо ў 2007 годзе быў запушчаны сайт orsha.belarda.org. Які праз некаторы час быў перанесены на адрас orsha.eu.
Калі мы пачыналі сваю працу, яшчэ кепска разумелі спецыфіку інтэрнэт - журналістыкі. Давялося вучыцца амаль з нуля. Але жаданне працаваць, шчырасць і энтузіазм, з якімі сябры рэдакцыі займаюцца сваёй справай і недахоп аб'ектыўнай інфармацыі ў рэгіёне прывялі да поспеху - зараз наш сайт самы папулярны інтэрнэт рэсурс, прысвечаны нашаму гораду.
Сёння 2 лістапада спаўняецца ўжо 8 год гэтай штодзённай, насамрэч, складанай працы над сайтам. Дзякуй усім людзям якія працавалі і працуюць над сайтам. Да гэтае пары большасць імёнаў аўтараў артыкулаў, фота і відэа аператараў, праграмістаў, якія працавалі або працуюць у рэдакцыі зараз, публічна не агучваюцца па прычынах бяспекі. Але адно імя назваць можна. Ала Самуілаўна Танчэўская, якая адышла ў іншы свет 10 кастрычніка. Гэтая мужная, шчырая, таленавітая, разумная і добрая жанчына дала першыя ўрокі журналістыкі той новай маладой камандзе, якая фармавалася. Так, даваць грамадству незалежную інфармацыю сёння ў нашай краіне - не самы бяспечны занятак. Дзякуй усім пазаштатным журналістам і "агентам", якія пастаўляюць навіны, дзякуючы вам сайт атрымліваў шмат унікальнай інфармацыі і першым асвятляў многія здарэнні ў рэгіёне, якія выклікалі вялікі інтарэс чытачоў і, адпаведна, давалі вялікія рэйтынгі для сайту. Дзякуй каментатар і блогерам - сайт не змог бы стаць настолькі папулярным, калі б не штодзённыя вострыя дыскусійныя каментары і актуальныя тэмы блогаў.
Дзякуй усім чытачам, якія ўсе 8 год заходзяць на старонку і тым хто толькі нядаўна даведаўся наш адрас. Наша работа ўсе гэтыя гады была перш за ўсё для вас.
