У гэты дзень - 7 лістапада - розныя людзі ўскладалі кветкі да розных помнікаў. У цэнтры горада пад музыку з гукаўзмацняльнікаў прыблізна дзесятак пенсіянераў разам унукамі і дзецьмі ўскладалі кветкі да помніка кіраўніка бальшавіцкай рэвалюцыі. А на Кабыляцкай гары крыху больш за 30 чалавек сабраліся каб ушанаваць памяць ахвяраў тых самых бальшавікоў. Сабраліся на Кабыляках не толькі аршанцы - з Лепеля прыехала сям'я Шушкевічаў. Іх родзіч - Тарэнда Шушкевіч - просты калкагснік быў абвінавачаны ў шпіянажы на карысць Польшы і растраляны ў Оршы, не выключана, што яго цела і зараз знаходзіцца дзесці на Кабыляцкай гары. Узгадваліся і многія іншыя гісторыі рэпрэсаваных: кагосці абвінавацілі ў шпіянажы, бо той меў некалькі польскіх манет, хтосці загінуў у лагерах за тое што таемна ахрысціў сына.
Пасля таго як кожны ахвотны выказаўся, узгадаў сваіх загінуўшых родзічаў, людзі ўсклалі кветкі - жывыя і штучныя кветкі, а на дрэвы побач з камянёў навязалі бел-чырвона-белыя стужкі.
