"Мазгабойня" - інтэлектуальная гульня, якая нядаўна з'явілася ў Беларусі і ўжо распаўсюдзілася на многія гарады. Орша стала 14-м горадам нашай краіны, дзе гуляюць у яе. У бары "Ліга" адбылася другая ў гісторыі Оршы гульня. Яна насіла навагодні характар - кожная каманда мусіла прыйсці ў залу ў навагодніх касцюмах ці ўпрыгожаннях. І свята атрымалася - усе каманды мелі пэўныя навагоднія атрыбуты.
Першы тур быў прысвечаны Новаму году, у лідэры адразу ж вырвалася каманда "Здесь тесно!" Зноў у гульні не было конкурсу навінаў, які ёсць на гульнях у Менску. Барацьба за верхнія пазіцыі трывала да самага канца. У 7-м туры (бліц, дзе правільныя адказы можна падвоіць дзякуючы рызыцы - пастаноўцы "птушачкі" насупраць версіі адказу) бліскуча выступіў калектыў "Кому не лень". Ён набраў цэлых 11 пунктаў і з 41 пунктам стаў пераможцам гульні.
Каманда "Здесь тесно!" завяршыла гульню на 2-й пазіцыі з 37 пунктамі, замкнула тройку "Анархия" з 32 баламі, па дадатковых паказчыках яна апярэдзіла "Нику".
Пераможцы першай гульні - каманда "Звяз" - у апошнім 7-м туры пайшлі ва-банк, але памыліліся, набралі толькі 1 пункт і з 27 выніковымі баламі сталі толькі 6-мі. Суцяшэннем першым аршанскім пераможцам "Мазгабойні" стаў прыз за маскі малпаў - сімвалу наступнага 2016 года.
Наступная гульня ў Оршы, паводле словаў арганізатараў, адбудзецца бліжэй да Старога Новага года.
На заключным фота - пераможцы, каманда "Кому не лень".
