Віды малака і кефіру з высокай доляй тлушчу на прылаўках з'яўляюцца ўсё радзей. Іх месца займаюць малако аршанскай вытворчасць крайне нізкага ўзроўню тлушча і кефірныя напоі. Такая сітуацыя, канешне, выклікае незадаволенасць аршанцаў, якая выліваецца перш за ўсё ў прэтэнзіях да работнікаў гандлю. Работнікам гандлю даводзіцца тлумачыць сітуацыю і апраўдвацца. Адзін з лістоў-адказаў на прэтэнзію запісаную ў кнізе скаргаў крамы мяркам патрапіў і да нас у рэдакцыю.

Ліст падпісаны кіраўніком Мяркаму С. Сіняковым. Паводле яго гандлёвая сетка працуе з 9 вытворцамі малака, у тым ліку і з Аршанскім камбінатам. Далей прыводзім цытату з ліста "Аднак з лістапада 2013 года ўсе вытворцы малочнай прадукцыі не выконваюць нашы заяўкі або адгружаюць мінімальную колькасць ад нашай заяўкі.

Такія пастаўшчыкі як ААТ "Пастаўскі малочны камбінат", ААТ "Полацкі малочны камбінат" скарацілі дні завоза, ААТ "Лепельскі малочнакансервавы камбінат" цалкам супынілі пастаўкі прадукцыі ў наш рэгіён, матывуючы тым, што неабходна забяспечыць малочнай прадукцыяй свой рэгіён (уласную сыравінную базу).

Паводле вуснага тлумачэння пастаўшчыкоў дадзеная сітуацыя склалася у сувязі са скарачэннем малочнай сыравіны ў параўнанні з мінулым годам на 25%, а таксама з тым, што перад малочнымі камбінатамі пастаўлена задача павелічэння экспартных паставак."

Раней мы ўжо пісалі пра значнае скарачэнне надояў у тым ліку і ў нашым рэгіёне. Цяпер гэтае скарачэнне вылілася на паліцы крамаў нашага рэгіёну.